RDC: Abarimo 6 bo mu muryango umwe bishwe n’abagizi ba nabi

Mu ijoro ryo ku wa Kabiri rishyira kuri uyu wa Gatatu tariki ya 28 Ukwakira, mu giturage cya Katoro, mu birometero nka 5 uvuye ahitwa Kiwanja, muri Teritwari ya Rutshuru, mu Ntara ya Kivu y’Amajyaruguru, mu burasirazuba bwa Repubulika Iharanira Demokarasi ya Congo, abantu 8 barimo batandatu bo mu muryango umwe bishwe n’abantu bitwaje intwaro batamenyekanye.

Sosiyete Sivile yo muri iki gice iravuga ko abo bantu babanje kwicisha amasasu n’imipanga abantu batandatu bo mu muryango umwe, ababyeyi babiri n’abana bane, bakomereza mu nzu baturanye bahica abandi bantu babiri bakomeretsa abandi babiri mbere yo kuburirwa irengero.

Ubu bwicanyi ngo bukaba bwabaye nyuma y’iminsi ibiri habaye ubundi bwakozwe ku Cyumweru, nabwo bwahitanye abantu batandatu muri iyi Teritwari ya Rutshuru.

Depite ku rwego rw’intara watorewe muri iyi zone witwa Bonaventure Shirimpuwe, asanga hakwiye kugira igikorwa mbere y’uko ibintu birushaho kuba bibi nk’uko Radio Okapi yanditse iyi nkuru ikomeza ibivuga.

Yagize ati "Biteye impungenge cyane, ejo twashyinguye abantu batandatu, none uyu munsi turavuga umunani bapfuye. Mu kwezi gushize nabwo twabonye ibintu nk’ibi bibabaje i Kinyandoni aho twaririye na none urupfu rw’abantu barindwi bo mu muryango umwe. I Kiwanja, baracyabikora mu gihe turi mu karere hamwe n’inama y’umutekano y’intara yose. Ndatekereza ko umuntu ukwiye gufata ikimasa ku mahembe ari Guverinoma nkuru igomba guhagarika izi nkuru".

Ubwicanyi bwo ku cyumweru gishize bwaguyemo abantu batandatu, bivugwa ko bwatewe n’ubushyamirane hagati y’abaturage bo mu bwoko bw’Abahutu n’abaturage bo mu bwoko bw’Abanande hafi ya Rutshuru rwagati.

Ku wa Kabiri, intumwa za komite ishinzwe umutekano mu ntara ziyobowe na visi Guverineri wa Kivu y’Amajyaruguru, Marie Lumoo, zari muri Rutshuru aho zari zagiye kugerageza guturisha amakimbirane.

Umukambwe w’imyaka 108 ahishuye aho SINA yakuye ubutunzi bwose, uyu mukambwe wamukoreye umuti arabivuze byose muri iyi Video:





Tanga igitekerezo kuri iyi nkuru



Igitekerezo