Uganda: Umuhungu wa Museveni yise Umudepite ‘igicucu’

Umuhungu wa Perezida Yoweri Kaguta Museveni, Lt Gen Muhoozi Kainerugaba yifatiye ku gahanga Umudepite wo muri Uganda witwa Joel Ssenyonyi, amwita igicucu kubera amagambo yari amaze kuvuga kuri se.

Joel Ssenyonyi ni Umudepite mu Nteko Ishinga Amategeko ya Uganda uhagarariye agace ka Nakawa y’Uburengerazuba. Uyu mugabo kandi ni umunyamategeko wabaye n’Umunyamakuru ukomeye muri Uganda kuko yakoze kuri televiziyo zitandukanye zirimo NTV. Ni umuvugizi w’ishyaka NUP rya Bobi Wine.

Intambara hagati ye n’umuhungu w’imfura wa Museveni yabyukijwe n’amagambo, Lt Gen Muhoozi Kainerugaba yanditse kuri Twitter anenga umutwe w’abasirikare uherutse guhirika ubutegetsi muri Guinée Conakry, ndetse agaragaza ko se aramutse abahaye uburenganzira bitabasaba igihe kinini ngo babakosore.

Ati “Umugaba w’Ingabo w’Ikirenga wacu aramutse aduhaye amabwiriza, ntabwo byafata UPDF umunsi ngo itoze ikinyabupfura yigishe ikinyabupfura abasirikare nk’aba bo muri Guinée Conakry.”

Aya magambo ya Lt Gen Muhoozi Kainerugaba yari aherekejwe n’ifoto ya Col Mamady Doumbouya ukuriye Umutwe udasanzwe wahiritse ubutegetsi bwa Alpha Condé.

Joel Ssenyonyi, ni umwe mu bahise bagira icyo bavuga kuri aya magambo y’umuhungu wa Museveni. Yamubwiye ko hari byinshi akwiriye kubanza gukora mbere y’uko ajya kwigisha ikinyabupfura abasirikare ba Guinée Conakry.

Ati “Umuhungu wa se, umunsi utari uyu nzakwibutsa uko so yafashe ubutegetsi. Kuri ubu, banza ufate abicanyi ba nyabo muri Masaka unahangane n’ibibazo by’umutekano muke muri Karamoja cyangwa ahandi hose mbere y’uko wivuga imyato!”

Umuhungu wa Museveni mu gusubiza uyu Mudepite yagize ati uri ‘Igicucu’.

Lt Gen Muhoozi Kainerugaba ni umwe mu banyacyubahiro bakunze gukoresha cyane Twitter muri Uganda, gusa bamwe mu bamukurikira bamunenga uburyo rimwe na rimwe ajya akoresha amagambo adakwiriye umuntu uri mu mwanya nk’uwe.

Lt Gen Muhoozi ni umwe mu basirikare bakomeye ba Uganda kuko ubu ari Umugaba w’Ingabo zirwanira ku butaka, umwanya yagezeho avuye ku Kuyobora umutwe w’Ingabo udasanzwe ufite n’inshingano zo kurinda se.





Tanga igitekerezo kuri iyi nkuru



Igitekerezo