Kuri uyu wa Gatandatu tariki 8 Kamena 2019, byari ibyishimo bikomeye ku mukobwa wa Perezida Kagame na Madamu Jeannette Kagame, Ange Ingabire Kagame ubwo yari yaserukanye n’umukunzi we Bertrand Ndengeyingoma mu birori ngarukamwaka by’icyumweru cyo kumurika imideli nyarwanda (Rwanda Fashion Week).

Urebye neza amafoto agaragaza Ange Ingabire Kagame n’umugabo we Bertrand Ndengeyingoma, bihita bikwereka ibyishimo bari bafite yanagaragaje ashimira byimazeyo abamwambitse we n’umukunzi we, bagaserukaba baberewe.

Abinyujije ku rubuga nkoranyambaga rwa Twitter, Ange Kagame yatangaje ko ku mugoroba wo kuri uyu wa Gatandatu, yagiye gushyigikira ibikorerwa mu Rwanda (Made in Rwanda) akitabira Rwanda Fashion Week ari kumwe n’umukunzi we Bertrand Ndengeyingoma wamusabye akanamukwa mu mpera z’umwaka ushize wa 2018.

Yashimiye kandi inzu itunganya imideli y’imbararo itandukanye y’ibikorerwa mu Rwanda izwi nka Moshions, kuba yaramwambitse neza we n’umukunzi we bakaberwa muri ibi birori. Yanashimiye kandi abateguye ibirori bya Rwanda Fashion Week bisanzwe biba buri mwaka.

N’akanyamuneza, Moses uyobora Moshions yavuze ko kuba Ange Kagame yishimiye uko we n’umukunzi we bambitswe, ari ishema kuri bo ariko bikaba n’ikimenyetso cy’uko ibikorerwa mu Rwanda bifite ubwiza bw’umwihariko. Yavuze ko buri wese akwiye gushyigikira ibikorerwa mu Rwanda no guharanira ko birushaho gutera imbere.

Ange Kagame yanyuzwe n’uburyo Moshions yabambitse bagaseruka muri Rwanda Fashion Week baberewe

@Umubavu.com
Amafoto: The New Times

---

---