Igihugu cy’u Buyapani kijeje gufasha umugabane wa Afurika gukuba kabiri umusaruro w’umuceri weza bitarenze mu mwaka wa 2030, iyi ikaba ari imwe mu ngamba nshya z’iki gihugu mu bufatanye bwacyo na Afurika.

Iruhande rw’inama ya karindwi ya Tokyo International Conference on African Development, TICAD, Minisitiri w’Intebe w’u Buyapani, Shinzo Abe yavuze ko ikoranabuhanga no guhanga udushya bizafasha cyane kugera kuri iyi ntego.

Banki Nyafurika itsura amajyambere ishyigikye iki cyifuzo cy’u Buyapani nk’uko Perezida w’iyi banki Akinwumi Adesina yabivuze.

Yagize ati "Nubwo hari byinshi bigerwaho mu buhinzi, ntabwo turi kubasha gutsinda inzara, tugomba twese guhaguruka kugira ngo turwanye inzara ku isi. Kubikora ni uguca inzara muri Afurika".

U Buyapani bufite umugambi wo kurushaho kwegera Afurika no kuhagira ijambo, nk’ayandi mahanga ari guharanira ijambo muri Afurika cyane cyane u Bushinwa.

U Buyapani busanzwe bufasha ibihugu by’u Rwanda n’u Burundi mu mishinga inyuranye y’iterambere, mu buhinzi, uburezi n’ikoranabuhanga.

Umuceri ni kimwe mu bihingwa byera mu bibaya byinshi muri Afurika, ni ikiribwa ariko gifatwa nk’icy’imiryango yishoboye mu bihugu by’u Rwanda n’u Burundi bifite umubare munini w’abakene.

Abari munsi y’umurongo w’ubukene mu Rwanda babarirwa kuri 38% (Banki y’isi/2016), mu Burundi ni 64% (Banki y’isi/2014), abo ni abatunzwe no munsi ya $1,9 (1,700Frw) ku munsi.

Ikiro kimwe cy’umuceri mu Burundi ku moko atandukanye yawo bitewe n’ubwiza, kiri hagati y’amafaranga 1,800 na 2,500Fbi, naho mu Rwanda kiri hagati ya 700 na 1,200Frw .

Kongera umusaruro w’umuceri byasobanura kugabanuka kw’ibiciro byawo, inkuru yaba nziza ku batabasha kuwigondera ubu.

Umuceri ufatwa nk’ibiryo by’abantu bishoboye mu Rwanda n’i Burundi

---

---